الفنان الكبير منصور الرحباني : بيرجع صوتك بيرجع
صورة من عالم الفن اللبناني الجميل
موقع الفينيق الإخباري
الفنان الكبير منصور الرحباني : بيرجع صوتك بيرجع !
” ولدين زغار كنا ، حد شويّا بالمينبيع ، وجّي ووجّ عاصي وهالحراش ، وصرخ صوت : ” طل الصباح وتكتك العصفور . “
هوّي صياد مارق ! هوّي مكاري !
ما قدرت أعرف لأن القصيده محيت اللي عم يقولا ..
بهاك الإيام كانت الدني تكتكات عصافير ، صباحات عم توعى ، وحراش صنوبر وسنديان ، حتى انو التبَس عا هاك الولدين ، وما كانوا يقدرو يميزو أيّا هيي الطبيعه وأيّا هيي القصيده ..
قديشك غميق وشاعر يا أسعد السبعلي !
واقف متل الجسر القاطب من طفولتنا لنهاياتنا .
قديشك قاعد بهالأرض ، حاضر بنبوعة المي وحيطان الكلّين ..
ليليّة بيحوشّو اسمك من حوافي الزهور ،
وليليّة بيقولو من وين عم يلفحنا هالعبير !
الناس اللي متلك مش هيّن يفلّو حتى لو فلّو .. لأنو انبثق من حضورن حضور آخر ، جوهر ، مش قابل للتلف ، هوّي الشعر .. لا بياكل ولا بيمرض ولا بينهار ، بيشعّ وبس .
وهيك يا أسعد جزء منك وقع بالتراب وصار تراب ، وجزء اتحد بالصيرورة وصار القصيدة والغنيّه والكتاب . سكن بين العين وبين اللفته ، بين الرهبه وبين البوح ..
وبيرجع صوتك بيرجع ، كل ما هدر الرعد فوق سبعل ، وصرّخت الريح بجرود الشمال .. “
….
منصور الرحباني ، وقد أُلقيت مسجّلة بصوته في كنيسة السيدة في سبعل في أربعين الشاعر 1999 ..
صفحة السبعلي الرسمية.